Sivilforsvaret

Siviilasuodjalus

Siviilasuodjalus lea stáhta gievrudanresursa mii galgá doarjut heahte- ja gádjunetáhtaid bargguid go deaividit stuorra ja erenoamáš dáhpáhusat - ja dat lea dehálaš doaibmi norgalaš gádjunbálvalusas.

Etáhtas lea operatiiva veahka masa gullet sullii 8 000 olbmo guđet leat geatnegasat doaibmat go leat stuorra ja erenoamáš dáhpáhusat. Juohke jagi Siviilasuodjalus gohčču veagas sullii 300 doaibmandáhpáhussii – buollimiidda, luonddulihkohisvuođaide, oljosuodjeválbmui, ohcamiidda, fárrehemiide, veahkkeneavvodoarjumiidda jna. Jos soahti buollá, de Siviilasuodjalus sáhttá gohččut doibmii viehka stuorra lassejoavkku.

Siviilasuodjalusa doaimmat
Dainna vugiin mo Norga geavaha Siviilasuodjalusa ráfiáiggi, mis lea govttolaš dáhkádus dasa ahte servodagas leat olbmot ja veahkkeneavvut maid sáhttá geavahit lassin go eará resurssat eai leat doarvái. Seammás Siviilasuodjalus čađaha earáge servodatdoaimmaid.

Siviilasuodjalus:

  • hálddaša máhtu, lea organiserejuvvon ja áimmahuššá veahkkeneavvuid vai sáhttá čađahit operatiiva doarjuma heahte- ja gádjunetáhtaide
  • oahpaha válmmu ja gádjundoaimmaid  iežas olbmuide ja norgalaš gádjunbálvalusa earáge doaibmiide
  • doarju veahkkebargguid mat čađahuvvojit eará riikkain go deaividit lihkohisvuođat
  • gullá atomalihkohisvuođaválbmui, ja lea dehálaš oassi riikka mihtidanfierpmádagas
  • jođiha riikkaviidosaš bálvalusa mii dieđiha álbmogii go lea stuorra várra áitimin
  • doaimmaha dehálaš bargguid jos soahti buollá

 

Olmmái- ja nissonolbmuid geatnegasvuohta bálvalit
Juohke olmmái- ja nissonolbmo lea siviilasuodjaluslága vuođul vejolaš geatnegahttit bálvalit Siviilasuodjalusa. Bálvalangeatnegas olbmuide oahpahuvvojit vuođđomáhtut maid dárbbašit buollin- ja gádjunbálvalusas, álgo¬heahtebálvalusas, oktavuođaid ja ortnega doallamis, ja kárttáid/kompássa/GPSa ja dakkáraččaid geavaheamis. Veahka lea juhkkojuvvon báikkálaš joavkkuide mat jeavddalaččat hárjehallojuvvojit ja gohčohallet doibmii dárbbu mielde – dávjá ovttasbargui politiijain, dollačáskadanveagain, dearvvasvuođaásahusain ja iešdáhtolaš organisa¬šuvnnaiguin.

Siviilasuodjalus gullá Servodatoadjebasvuođa ja válmmu direktoráhta vuollái, mii dárogillii lea”Direktoratet for samfunnssikkerhet og beredskap” (DSB).

Oktavuođaváldindieđut
Oktavuođa olmmoš galgá eanaš dáhpáhusain váldit Siviilasuodjalussii dan siviilasuodjalusguvlui njuolga masa ieš gullá. Nu lea buot oktavuođaváldimiid dáfus go lea dárbu oažžut veahki fáhkkadis dáhpáhusain ja go bálvalan¬geatnegas olbmot váldet oktavuođa. Mii bivdit din ipmirdit ahte lea dárogillii dárbu váldit oktavuođa siviila¬suodjalus¬guovlluide, ja vástádusatge šaddet dárogillii.

Iežat siviilasuodjalusguovllu siidduin don gávnnat dieđuid oktavuođa váldima birra. Alitdásat oktavuođa-váldimat mat gusket oppa etáhtii, galget dása:

Direktoratet for samfunnssikkerhet og beredskap (DSB).
Avdeling for brann, redning og sivilforsvar
Postboks 2014
3103 Tønsberg

Telefon 33 41 25 00
Telefaks 33 31 06 60
postmottak@dsb.no